Орус аскерлери Украинанын куралдуу күчтөрүн Орусиянын аймагынан сүрүп чыгаруу үчүн каршы чабуулга өткөнүн бир нече Telegram каналдары кабарлашты.
Украиналык Deep State аскер порталы Коренево аймагында орус бөлүктөрү алдыга жылып жатканын билдирди. Порталдын Telegram-каналы Украинанын куралдуу күчтөрүнүн бул багыттагы маанилүү таянычы болгон Снагост айылын көздөй россиялык бронетранспортёрлордун колонналары баратканын көрсөткөн кадрларды жарыялады. Кадрларда кеминде сегиз танк жана бронетранспортер бар.
Deep State порталынын билдирүүсүндө, орустар “активдүү чабуул операцияларын баштады, адегенде бронетранспортерлер менен Сейм дарыясын кечип, андан соң башка кичинекей дарыяларды кесип өтүштү”.
Орус каналдары Коренево аймагында армия тездик менен чыгышты көздөй жылып жатканын жана 150 чарчы метр аянттагы сегиз айылды бошоткондугун кабарлады. Орусиянын Коргоо министрлигине жакын “Рыбар” жана “Эки майор” телеграм каналдарынан кабарлашкандай, орус армиясы Гордеевка жана Внезапное кыштактарын басып алган. Бул конуштар Украина чек арасынан 4-6 чакырым алыстыкта жайгашкан жана августтун ортосунан бери Украинанын куралдуу күчтөрүнүн көзөмөлүндө.
“Ахмат” атайын күчтөрүнүн командачысы, генерал-майор Апти Алаудинов РИА Новостиге “онго жакын конуш буга чейин тазаланып, орус аскерлеринин көзөмөлүндө экенин” билдирди.
